ཁེངས་རིགས་རྣམ་གསུམ་ཤོ་ ཤར་ལོག་ཀོ་ གཞལམ་སྒང་རྫོང་ཁག་ན་གཞི་ཆགས་ཚེ་ནག་ལོབ་ཝེན། འོང་ཀའི་ས་ཆ་ཐེག་ནེང་ལྷག་ཚེ་མཱུད་པམ་ཅེ་ འོང་ཀའི་ཡང་ ཐེག་ན་བསྡོམ་ཟེ་ནག་ཁཱན་ མི་སྡེ་ཐེག་ཝེན། ཧི་ནིང་ རང་ ཨའི་ཝའི་ཝེན་པམ་ འོང་ཀའི་ཅེ་ལམ་ལུགས་སྲོལ་བག་སྲུང་ཟེ་ གུས་ཞབས་བུ་ཁཱན་བག་ཝེན།
ཧེ་ནའི་ རང་ལུགས་ཀྱི་མ་ནི་ནིང་ ལམ་ལུགས་སྲོལ་བག་གི་ ད་ཚུམ་ཡམ་པེད་ནིང་ སྣ་རོའི་ ངེ་རའི་ཀུརུན་བག་ཏཱུན་ལོབ་ཝེན། ཝིན་བག་ ངེ་ཅེ་མི་བག་དེ་རེ་ འབྲེལ་བ་འཐབ་ཏེ་དཱོན་དོ་ ཝིན་ཐམས་ཅཱད་ན་བྱོན་པ་ནག། དང་པ་ ངེ་ཅེ་ལམ་ལུགས་སྲོལ་བག་ཉམས་མྱོང་བུ་ཟི་ ཁེངས་རིགས་རྣམ་གསུམ་ན་ ངེ་ཅེ་སྐོར་ནེང་མང་ཝ་བཱརན་དོ་ཚུགས་ཀེ་དཱོན་དོ་ ཞིབ་འཚོལ་བུ་ཡའི།
ངེ་ཅེ་ འབྲུག་གི་ལམ་ལུགས་སྲོལ་ན་ ནང་རྟེན་ངོ་མ་ཐེག་བུ་ཟི་ཕུ་ལོབ་ཝེན། ངེ་ཅེ་ ལམ་ལུགས་སྲོལ་ནིང་ ང་ེཅེ་མི་སེར་བག་གི་བདེ་སྐྱིད་ ཧི་ནིང་ ངེ་ཅེ་རྒྱུ་ནོར་ལོང་སྤྱོད་བག་ ཞིབ་འཚོལ་བུ་གེ་དཱོན་དོ་ ཝིན་ཐམས་ཅཱད་ན་གདན་འདྲེན་ཞུ་ཏག།
ཨོ་ན་བྱོན་ཟེ་ ཁེངས་རིགས་རྣམ་གསུམ་ན་ནག་ཁཱན་བག་ ཉམས་མྱོང་མྱེང་གེ་དཱོན་དོ་ འོང་ཀའི་ལམ་ལུགས་སྲོལ་ ཉམས་སྲུང་བུ་གིམ་ཐེག་མེ་དོ་རོ་ ཉིན་ལ་གཱརང་མི་གི་རྩི་སྲུང་བུ་ཁཱན་ བག་ཉམས་མྱོང་བུ་ཡའི།
ཁེངས་རིགས་རྣམ་གསུམ་མཉམ་ལས་ཚོགས་སྡེ་གཞི་བཙུགས་བུ་རོ་དགོ་ཁཱན་དོན་དག་ངོ་མ་ཤོ།
༡) ལཱ་གཡོག་མ་མྱེང་ཁཱན་ན་གཞོན་བག་ན་ གོ་སྐབས་བི་གེ་དཱོན་དོ།
2. གྲོང་གསེབ་ནེང་ ཁྲོམ་ན་གནས་པུ་ཟི་གའི་ཁཱན་བག་ མར་ཕབ་བུ་གེ་དཱོན་དོ།
3. ནང་འདྲེན་ཕབ་ཏེ་དཱོན་དོ།
4. རང་གི་ཐོན་སྐྱེད་བག་ ཕིད་ནའི་ཚོང་ཡར་ཇེད་ཐུང་གེ་དཱོན་དོ།
5. གཞལམ་སྒང་རྫོང་ཁག་ནང་གོ་ རུག་ཚོད་རིགས་བག་ཇོབ་ཇོབ་ལང་ཏོ་ཁེར་ཏེ་དཱོན་དོ།
